Wat beteken lidmaatskap van NG Bult?

Lidmaatskap by NG Bult beteken dat jy deel word van ‘n geloofsgemeenskap wat saamwerk om ons visie te leef: as die liggaam van Christus verheerlik ons God deur aanbidding en gehoorsaamheid; ons versterk mekaar deur gebed, ondersteuning en gesamentlike groei; ons versorg mense deur praktiese hulp en liefdevolle bediening; en ons verkondig die evangelie met ywer, binne en buite ons gemeenskap. Lidmaatskap is ‘n uitnodiging om aktief deel te neem, jou gawes te gebruik, en saam met ons die liefde van Christus uit te dra.

Ons verstaan lidmaatskap nie as ‘n blote formele of historiese verbintenis aan die NG Kerk nie, en ook nie as iets wat outomaties bepaal word deur waar ek woon nie. Ons sien dit eerder as ‘n doelbewuste keuse om my Christenskap en roeping aktief deur hierdie gemeente uit te leef. Lidmaatskap is ‘n verbintenis om betrokke te wees in die gemeente en om my diensbaarheid aan die Here hier én in die samelewing te beliggaam.

Ons fokus

Ons fokus is nie net om gemeente-aktiwiteite in stand te hou of uit te brei nie, maar om as gelowiges en as gemeente, deur die krag van die Gees, ‘n werklike verskil in die samelewing te maak – beide op persoonlike vlak en as ‘n gesamentlike geloofsfamilie in die plek waar die Here ons geplaas het.

As jy deel wil word van ons geloofsgemeenskap, klik op die skakel hieronder om na ‘n vorm te gaan waarin jy al die nodige besonderhede kan invul en terugstuur.